काभ्रेमा डेंगुको संक्रमण बढ्दै

काभ्रेपलाञ्चोक।  काभ्रेपलाञ्चोकमा पछिल्ला केही दिनयता डेंगु संक्रमितको सङ्ख्या बढ्दै गएको छ। पछिल्लो २४ घण्टामा जिल्लामा छ जनामा संक्रमण देखिएको धुलिखेलस्थित जिल्ला स्वास्थ्य कार्यालयले जनाएको छ।

थपिएका संक्रमित चार महिलासहित छ जना बनेपा नगरपालिका पाँचखाल नगरपालिका र रोशी गाउँपालिकाको बासिन्दा रहेको कार्यालयका निमित्त प्रमुख डा अनिता खनालले जानकारी दिइन्।  उनका अनुसार अझै केही दिन डेंगु संक्रमण बढ्नसक्ने अनुमान गरिएको छ। 

अघिल्ला दुई दिन नौ जनामा डेंगुको संक्रमण देखिएको थियो। कार्यालयको दैनिक तथ्याङ्कअनुसार कात्तिक महिनाको १२ दिनमा २७ जनामा डेंगु संक्रमण देखिएको थियो। यस्तै यस आर्थिक वर्षको साउनदेखि हालसम्म जिल्लामा ८९ महिला र ८४ पुरुष गरी एक सय ७३ जनामा डेंगु पुष्टि भएको कार्यालयले जनाएको छ। जिल्लामा गत असोज अन्तिम साता पुनः डेंगुको संक्रमण देखिएको थियो।

जिल्लाको १३ स्थानीय तहमध्ये बेथानचोक गाउँपालिका बाहेक हाल १२वटै स्थानीय तहमा डेंगुका संक्रमित पुगेका थिए। तीमध्ये सबैभन्दा बढी बनेपा नगरमा ७१ संक्रमित थिए।     यस्तै धुलिखेल नगरमा २१, पनौती नगरमा २०, पाँचखाल नगरमा सात, नमोबुद्ध नगरमा २२ जना डेंगु संक्रमित थिए। मण्डनदेउपुर नगरमा १८, भुम्लु गाउँपालिकामा एक, रोसीमा आठ, तेमालमा दुई, खानी खोलामा एक, महाभारत र चौंँरीदेउराली गाउँपालिकामा एक÷एकजना संक्रमित रहेको कार्यालयले जनाएको छ। संक्रमितमध्ये केही विभिन्न अस्पतालमा उपचाररत रहेको जनाइएको छ।

जिल्लामा गत आवको अन्त्यसम्म छ सय ८० जना डेंगुबाट संक्रमित भएका थिए। डेंगुको उच्च जोखिमका रुपमा रहेको काभ्रेपलाञ्चोकमा केही महिनादेखि प्रत्येक शुक्रबार ‘खोज र नष्ट गर’ अभियान सञ्चालन गरिएको थियो। डेंगुको उच्च जोखिम रहेको दस जिल्लामध्येमा काभ्रेपलाञ्चोक पनि समावेश छ। 

लामखुट्टेको टोकाइबाट सर्ने डेंगुको बिरामीलाई एक्कासि उच्च ज्वरो आउने र पाँचदेखि सात दिनसम्म ज्वरो रहने, सहन नसक्नेगरी टाउको दुख्ने, आँखाको नानी तथा पछिल्लो भाग दुख्नका साथै ढाड, जोर्नी र मांसपेशी दुख्ने, शरीरमा बिमिरा आउने तथा वाकवाकी लाग्ने, पेट दुख्ने, नाक तथा गिजाबाट रगत बग्ने, शरीरमा रगत जेमेको दाग देखापर्ने तथा बेहास हुने लक्षण देखिन्छ। समयमै उचित उपचार नपाए बिरामीको मृत्युसमेत हुने गर्दछ। 

लामखुट्टेले बसोबास गर्नसक्ने सवारी साधन थगन मर्मत केन्द्र, टायर, पानी जम्ने ठाउँ, खेतबारीमा राखिएको टायर, उद्योग, कलकारखाना, होटेल तथा व्यवसायमा रहने टायर, घर तथा अफिसमा रहने गमला, सजावट सामग्री, मठ–मन्दिरमा रहेका कतराजस्ता पानी जम्ने ठाउँलाई नियमित सरसफाइ गर्न तथा पानी जम्न नदिन सरकारले अपिल गर्दै आएको छ। 

रासस