इलाम अस्पतालमा शय्या अभाव, भूइँमै राखेर उपचार
इलाम। इलाम अस्पतालमा आउने बिरामीलाई शय्या अभाव भएपछि भुइँमै राखेर उपचार गर्न थालिएको छ। पछिल्लो समय अस्पतालमा डेङ्गु, ज्वरो र स्कपटाइफसका बिरामी बढेपछि शय्या अभाव हुँदा भुइँमै राखेर उपचार गरिरहेको अस्पतालले जनाएको छ।
अहिले दैनिकजसो ७० देखि ८० को सङ्ख्यामा आकस्मिक कक्षमा बिरामी आउने गरेको आकास्मिककक्ष इन्चार्ज टीका लुइँटेलले जानकारी दिए। उनका अनुसार अस्पताल आउने मध्ये अधिकांश डेंगु, स्क्रपटाइपस र भाइरल ज्वरोका बिरामी छन्।
‘जीउ दुख्ने, हात खुट्टा करकर खाने, आँखाका दाना दुख्ने, प्रेसर कम हुने, ज्वरो अत्याधिक आउने लक्षणहरु लिएर अधिकांश बिरामी आउने गरेका छन्,’ लुइँटेलले भने, ‘अस्पतालमा भर्ना गरेर उपचार गर्नुपर्ने अवस्थाका बिरामीलाई भुइँमै भए पनि उपचार गरिरहेका छौँ।’
अस्पतालको ओपिडीमा पनि दैनिक तीन सय ७५ जनासम्म बिरामी आउने गरेका अस्पतालका व्यवस्थापक क्षितिज खतिवडाले जानकारी दिए। उनका अनुसार आकस्मिक कक्षमा जम्मा ११ शय्या मात्र छन्। ‘आकस्मिक कक्षमा भर्ना भएर आएका बिरामीलाई शय्या नपुगेपछि भुइँमै राखेर सेवा दिइरहेका छौँ,’ व्यवस्थापक खतिवडाले भने, ‘ओपिडीमा पनि बिरामीको सङ्ख्या थामिनसक्नु छ। जसोतसो उपचार गरिरहेका छौँ।’
उनका अनुसार साउन र भदौ १० गतेसम्ममा जाँच गराउन आउनेमध्ये ४१ जनामा डेंगु पुष्टि भएको छ। सोही अवधिमा २४ जनामा स्कपटाइफस देखिएको छ। ‘यीमध्ये डेङ्गुका १० र स्कपटाइफसका पाँच जना बिरामीलाई भर्ना नै गरेर उपचार गराएका छौँ,’ उनले भने।
जिल्लाको फाकफोकथुम गाउँपालिकाबाट उपचारका लागि आएकी माया थेबेले शय्या नपाउँदा उपचारमा असहज भएको बताए। उनले भने, ‘ज्वरोले सिकिस्त पारेर अस्पताल आएको भुइँको चिसोले ज्यानै लैजाला जस्तो छ।
जिल्लामा अहिलेसम्म दुई सय तीन जनामा डेङ्गु सङ्क्रमण पुष्टि भएको जिल्ला स्वास्थ्य कार्यालयले जनाएको छ।
रासस
